គម្រោងបង្ការគ្រោះមហន្តរាយ
គម្រោងនេះត្រូវបានរៀបចំឡើងដើម្បីធានាថាជនរងគ្រោះនៃគ្រោះមហន្តរាយផ្សេងៗត្រូវបានការពារ និងទទួលបានការព្យាបាលយ៉ាងត្រឹមត្រូវ។ គិតមកដល់ពេលនេះ អង្គការមូលនិធិ ម៉េងលី ជេ. គួច បានធ្វើសកម្មភាពជួយសង្រ្គោះជនរងគ្រោះដោយគ្រោះមហន្តរាយធម្មជាតិជាច្រើននៅទូទាំងប្រទេសកម្ពុជា និងក្រៅប្រទេសផងដែរ រួមមានប្រទេសហ្វីលីពីន និងប្រទេសនេប៉ាល់។
ជាលទ្ធផលជាក់ស្តែង កាលពីរសៀលថ្ងៃទី១៧ ខែមករា ឆ្នាំ២០២០ ក្រុមការងារអង្គការមូលនិធិ ម៉េងលី ជេ. គួច បាននាំយកថវិកាចំនួន១០,០០០ដុល្លារក្នុងគោលបំណងដើម្បីរួមចំណែកជួយដល់ក្រុមគ្រួសារជនរងគ្រោះដែលជួបនូវសោកនាដកម្មដ៏រន្ធត់ក្នុងហេតុការណ៍បាក់រលំអគារ៧ជាន់។ គួររម្លឹកថា ជនរងគ្រោះដែលត្រូវបានជួយសង្គ្រោះយកចេញពីគំនរបាក់បែកនៃអគាររលំ មានចំនួនសរុប៥៩នាក់ (ស្រី២២នាក់) ក្នុងនោះបាត់បង់ជីវិតចំនួន៣៦នាក់ (ស្រី១៤នាក់) ក្នុងចំណោមជនរងគ្រោះទាំងនេះ មានក្មេងចំនួន០៦នាក់ (ក្មេងស្រី២នាក់) និងរងរបួសចំនួន២៣នាក់ (ស្រី០៨នាក់)។ គួររម្លឹកផងដែរថា កាលពីឆ្នាំ២០១៩កន្លងទៅ អង្គការមូលនិធិ ម៉េងលី ជេ. គួច ធ្លាប់បានយកថវិកាចំនួន១០,០០០ដុល្លារ បរិច្ចាគជូនទីស្តីការគណៈរដ្ឋមន្ត្រី ដើម្បីរួមចំណែកជួយដល់ក្រុមគ្រួសារជនរងគ្រោះដែលជួបនូវសោកនាដកម្មដ៏រន្ធត់ក្នុងហេតុការណ៍បាក់រលំអគារនៅក្នុងខេត្តព្រះសីហនុ។
កាលពីពេលថ្មីនេះ អង្គការមូលនិធិ ម៉េងលី ជេ. គួច បានបន្តសកម្មភាពឆ្លើយតបគ្រោះមហន្តរាយជាមួយរាជរដ្ឋភិបាលកម្ពុជា ដោយក្នុងនោះអង្គការមូលនិធិ ម៉េងលី ជេ. គួច បានយកថវិកាចំនួន១០០,០០០,០០០រៀល ស្មើនិង២៥,០០០ដុល្លារបរិច្ចាគជូនខុទ្ទកាល័យសម្តេចតេជោ ហ៊ុន សែន ដើម្បីជួយសង្រ្គោះដល់ប្រជាពលរដ្ឋរងគ្រោះដោយសារទឹកជំនន់ក្នុងឆ្នាំ២០២០ប្រមាណ១៤៨,៥៩៧គ្រួសារក្នុង២០ខេត្តក្រុងនៃប្រទេសកម្ពុជា។ មិនតែប៉ុណ្ណោះ ក្រៅពីការបរិច្ចាគខាលើនេះ អង្គការមូលនិធិ ម៉េងលី ជេ. គួច ផ្ទាល់បានចំណាយថវិកាបន្ថែមចំនួនជិត៣០,០០០ដុល្លារក្នុងការឆ្លើយតបគ្រោះទឹកជំនន់ ដោយបានបរិច្ចាគគ្រឿងឧបភោគ បរិភោគ និងសាច់ប្រាក់ជូនដល់ប្រជាពលរដ្ឋចំនួន៤៩៤គ្រួសារក្នុងរាជធានីភ្នំពេញ និងខេត្តកណ្តាល។
លើសពីនេះទៅទៀត កាលពីថ្ងៃទី៨ ខែធ្នូ ឆ្នាំ២០២០ ដើម្បីចូលរួមជាមួយរាជរដ្ឋាភិបាលកម្ពុជា ក្នុងប្រយុទ្ធប្រឆាំងនិងជំងឺកូវីដ១៩ អង្គការមូលនិធិ ម៉េងលី ជេ. គួច បានបរិច្ចាគថវិកាចំនួន១០,០០០ដុល្លារជូនទីស្តីការគណៈរដ្ឋមន្រ្តី ដើម្បីរួមចំណែកទិញវ៉ាក់សាំងកូវីដ១៩។
