មូលនិធិ ម៉េងលី ជេ. គួច និងសិស្សសាលា Aii ចែកអំណោយដល់សាលា ទួលពន្លៃ ខេត្តកំពត
ថ្ងៃអាទិត្យ, ខែកញ្ញា 18, 2022
មូលនិធិ ម៉េងលី ជេ.គួច និងយុវជនស្ម័គ្រចិត្ត Spring Forward នៃមជ្ឈមណ្ឌលភាសា អេ អាយ អាយ កាលពីថ្ងៃទី១៨ ខែកញ្ញា ឆ្នាំ២០២២ បានចែកអំណោយសប្បុរសធម៌ ដូចជាសម្ភារសិក្សាចំនួន២៩៧កញ្ចប់ គ្រឿងឧបភោគបរិភោគ សម្លៀកបំពាក់ កញ្ចប់អាហារសម្រាប់សិស្ស និងថវិកាមួយចំនួន ទៅដល់សិស្សានុសិស្សចំនួន២៦៧នាក់ និងប្រជាពលរដ្ឋជិត១០០គ្រួសារ ក្នុងសាលាបឋមសិក្សា ទួលពន្លៃ ឃុំស្ទឹងកែវ ស្រុកទឹកឈូ ខេត្តកំពត។
មូលនិធិ ម៉េងលី ជេ. គួច បានកំពុងពង្រីកសកម្មភាពរបស់ខ្លួនដើម្បីជួយដល់ជនក្រីក្រ និងអ្នកខ្វះខាតឱ្យបានកាន់តែច្រើនបន្ថែមទៀត។ អំណោយដែលបានផ្តល់ឱ្យពួកគាត់ អាចជួយស្តារជីវភាពឡើងវិញ និងបន្តជីវិតរបស់ពួកគាត់។ អ្នកទទួលអំណោយទាំងអស់នោះ បានបង្ហាញទឹកមុខសប្បាយរីករាយខ្លាំងណាស់ ហើយមូលនិធិ ម៉េងលី ជេ. គួច មានការប្តេជ្ញាចិត្តខ្ពស់ក្នុងការធ្វើសកម្មភាពផ្តល់ជំនួយដល់ជនងាយរងគ្រោះទាំងនោះ។
សេវាកម្មសប្បុរសធម៌របស់មូលនិធិ ម៉េងលី ជេ. គួច គឺជាការផ្តួចផ្តើមមួយដែលកំពុងតែមានសកម្មភាពជាបន្តបន្ទាប់ ដើម្បីជួយប្រជាជនក្រីក្រ តាមរយៈការផ្តល់ជំនួយដល់ប្រជាជន ដែលមានជីវភាពខ្វះខាត។ មូលនិធិ ម៉េងលី ជេ. គួច នៅតែបន្តឆ្លើយតបក្នុងសកម្មភាពអភិវឌ្ឍនៅតាមជនបទ និងតំបន់ដាច់ស្រយាលនានា។ ពួកយើងមានឈាមជ័រតែមួយ ហេតុនេះពួកយើងទាំងអស់គ្នាចង់បង្ហាញដល់មនុស្សជំនាន់ក្រោយៗឱ្យបានឃើញថា ពួកយើងអាចជួយគ្នា ដើម្បីសេចក្តីសុខរបស់មនុស្សគ្រប់គ្នាទាំងពេលបច្ចុប្បន្ន និងទៅអនាគត។
