គម្រោងសិក្ខាសាលាសប្បុរសធម៌ឧកញ៉ា វេជ្ជបណ្ឌិត គួច ម៉េងលី

គម្រោងសិក្ខាសាលាសប្បុរសធម៌ឧកញ៉ា វេជ្ជបណ្ឌិត គួច ម៉េងលី គឺជាគម្រោងមួយក្នុងចំណោមគម្រោងទាំង៦ នៃកម្មវិធីអប់រំ របស់មូលនិធិ ម៉េងលី ជេ. គួច។ គម្រោងនេះត្រូវបានរៀបចំឡើងក្នុងគោលបំណងចែករំលែកចំណេះដឹង និងចំណេះធ្វើដល់យុវជនជំនាន់ក្រោយដើម្បីត្រៀមខ្លួន និងជ្រើសរើសមុខជំនាញឱ្យបានត្រឹមត្រូវសម្រាប់ថ្នាក់ឧត្តមសិក្សា និងដើម្បីរៃអង្គាសថវិកាសម្រាប់ការងារសង្គម ឬកម្មវិធីសប្បុរសធម៌ជួយដល់ចាស់ជរាគ្មានទីពឹង គ្រួសារងាយរងគ្រោះនៅតំបន់ដាច់ស្រយាល ឬដើម្បីសាងសង់អាគារសិក្សា សម្ភារៈសិក្សា និងសម្ភារៈបង្រៀន។ល។

មូលនិធិ ម៉េងលី ជេ. គួច បាននឹងកំពុងសហការជាមួយក្រុមហ៊ុន អង្គការជាតិ អន្តរជាតិ សាកលវិទ្យាល័យ និងសហគ្រិនវ័យក្មេង ដើម្បីរៀបចំសិក្ខាសាលាសប្បុរសធម៌នេះដល់យុវជន និស្សិត ស្ថាប័នអប់រំ បុគ្គលិកក្រុមហ៊ុន និងអង្គការទាំងឡាយនៅភ្នំពេញនិងនៅតាមបណ្តាខេត្តនានាក្នុងប្រទេសកម្ពុជា។

ក្រៅពីសិក្ខាសាលាក្នុងប្រទេស អ្នកឧកញ៉ា វេជ្ជបណ្ឌិត គួច ម៉េងលី ក៏ត្រូវបានអញ្ជើញជាវាគ្មិនកិត្តិយសសម្រាប់សិក្ខាសាលានៅក្រៅប្រទេសដូចជាប្រទេសកូរ៉េខាងត្បូង ប្រទេសថៃ និងបណ្តាប្រទេសជាច្រើនទៀត។

រហូតមកដល់ពេលនេះគម្រោងនៃសិក្ខាសាលាសប្បុរសធម៌របស់អ្នកឧកញ៉ា វេជ្ជបណ្ឌិត គួច ម៉េងលី បានរៀបចំឡើងចំនួន ០៧ លើកមកហើយដោយមានសិស្ស និស្សិត លោកគ្រូ អ្នកគ្រូ បុគ្គលិកអង្គការជាតិ និងអន្តរជាតិ បុគ្គលិកក្រុមហ៊ុន និងយុវសហគ្រិនវ័យក្មេង សរុបចំនួន ៣,៨០៥នាក់ ក្នុងខេត្តចំនួន៥ ដូចជាខេត្តសៀមរាប បាត់ដំបង កំពង់ចាម កំពង់ស្ពឺ និងភ្នំពេញ។